DODOMA: WIZARA ya Kilimo imezindua mpango wa siku kumi wa mafunzo ya uendeshaji wa ndege zisizo na rubani za kilimo kwa wataalam wa kilimo, ikiwa ni mkakati wa kuimarisha matumizi ya teknolojia ya kisasa katika kuongeza tija na kipato cha wakulima. Mafunzo hayo yaliyoanza leo mjini Dodoma yamezinduliwa na Naibu Katibu Mkuu wa Wizara ya Kilimo anayeshughulikia Umwagiliaji na Vifaa vya Kilimo, Athumani Kilundumya, ambaye amewataka wataalam wa kilimo kuhakikisha ujuzi wanaoupata wanautumia kwa vitendo na kuwanufaisha wakulima moja kwa moja.
Aidha, alisema lengo la serikali ni kuwasaidia wakulima kuongeza kipato na kuifanya sekta ya kilimo kuwa chachu ya maendeleo ya kiuchumi. PIA SOMA: Tanzania inataka kugeuza Dodoma kuwa kitovu cha utalii cha ukanda wa kati Aidha alisema matumizi ya ndege zisizo na rubani katika shughuli za kilimo kama vile uchanganuzi wa udongo, ufuatiliaji wa shamba na uwekaji wa viuatilifu ni muhimu kwa ajili ya kuongeza ufanisi na kupunguza gharama za uzalishaji.
Mafunzo hayo yanaendeshwa na Kampuni ya ROKO DC kutoka India, kwa kushirikiana na wataalamu wa idara na taasisi mbalimbali za Wizara ya Kilimo na wadau wake, wakiwemo mpango wa Jenga Kesho Bora (BBT), Taasisi ya Utafiti wa Kilimo Tanzania (TARI), Mamlaka ya Udhibiti wa Mbolea Tanzania (TFRA), Mamlaka ya Afya na Viuatilifu vya Mimea Tanzania (TPHPA), na Bodi ya Korosho.