MWANZA: POLISI mkoani Mwanza inawashikilia watu watano wanaodaiwa kuharibu mabango ya kampeni ya wagombea wa nafasi ya urais, ubunge na udiwani wa Chama Cha Mapinduzi (CCM). Mabango hayo yameripotiwa kuharibiwa katika maeneo mbalimbali Jijini Mwanza. Mamlaka inaendelea na uchunguzi kuhusu tukio hilo. Kamanda wa Polisi Mkoa wa Mwanza, Wilbroad Mutafungwa, aliwaambia waandishi wa habari Ijumaa kuwa washukiwa hao wanaendelea kuhojiwa. Mutafungwa aliwataja watuhumiwa hao watano kuwa ni Charles Chinchibela mkazi wa mtaa wa Temeke, Marko Christian na Enock Mpaka. Aliwataja wengine kuwa ni Salumu Libaba na Dioniz Leons wote wakazi wa jiji la Mwanza. RPC alisema watuhumiwa hao walikamatwa Septemba 30, saa 8:00 mchana katika maeneo mawili tofauti wakati wakiratibu mipango ya kuharibu mabango ya wagombea wa CCM wa nafasi za ubunge, udiwani na urais. Jeshi la Polisi limewataka viongozi, mashabiki, wafuasi na wanachama wa vyama vya siasa kuendelea kuheshimu sheria, kanuni, taratibu na miongozo iliyowekwa na Tume Huru ya Uchaguzi (INEC) ili kampeni ziendelee bila matatizo.