ZANZIBAR: Mgombea Urais wa Chama cha ACT Wazalendo, Othman Masoud Othman ameahidi kuwa, akichaguliwa kuwa Rais wa Zanzibar, atasimamia Muungano na Tanzania Bara huku akihakikisha kwamba maslahi ya Zanzibar ndani ya Muungano yanalindwa kikamilifu. Akihutubia katika mkutano wa kampeni katika viwanja vya Mjimbini Jimbo la Mtambile Wilaya ya Mkoani Pemba, Bw Othman alisema Zanzibar ni mshirika muhimu wa Muungano lakini akasisitiza kuwa yanahitajika marekebisho ili kuuimarisha.
Alieleza kuwa Wazanzibari wasiendelee kuishi katika umasikini ndani ya Taifa lililobarikiwa kuwa na rasilimali nyingi na kuongeza kuwa mageuzi katika Muungano yatasaidia kujenga uchumi imara na kuwaondoa wananchi katika umaskini. Akielezea vipaumbele vyake vya kisera, aliahidi kuwajengea uwezo wakulima wa Pemba kwa kutumia zana na mbinu za kisasa ili kuongeza tija, na kubainisha kuwa licha ya uwekezaji wa miaka mingi bado wengi wanatatizika kutokana na mavuno kidogo. Aidha aliahidi kufufua tasnia ya karafuu Zanzibar ambayo ni uti wa mgongo wa uchumi wake kwa kuikomboa sekta hiyo ili kuhakikisha wakulima wananufaika moja kwa moja na bidii yao.
Bw Othman alisema zaidi kwamba, ikiwa atachaguliwa, ataanzisha Mfuko Maalum wa Zakat kusaidia maskini zaidi na walio hatarini zaidi, kwa lengo la kupunguza kutengwa na kukuza ushirikishwaji wa kijamii. Alisema serikali yake itaanzisha mfumo rasmi wa zakat ili kuhakikisha msaada huo unawafikia walengwa na kuboresha maisha yao ya kila siku kwa dhati. Wananchi kadhaa katika mkutano huo walionyesha matumaini kuhusu maono ya Bw Othman. Bi Zena Ali, mkazi wa Mtambile, alisifu sera zake na kusema alijisikia kutiwa moyo na ahadi zake.
Mjasiliamali kijana Rashid Suleiman naye alitoa maoni yake huku akibainisha kuwa vijana wanatafuta kiongozi atakayewawezesha kutengeneza fursa za kujiajiri kupitia kilimo na biashara.